Vijiun
Dui stac, trëi teritori, öna n’Euregio: tl cör dl’Europa, mët nosta Euregio adöm
i trëi teritori de Tirol, Südtirol y dl Trentin, liá imprömadedöt da na storia
deboriada, mo ince da tröc aspec geografics, economics y culturai.
Nosc fin é chël da costruí lians stersc, da vire unis tla diversité, da ciaré
imprömadedöt da tigní adöm jon sura i confins nazionai fora: avisa sciöche
na picia Europa tl’Europa. Nosc stromënt é chiló la cooperaziun che vá sura
les naziuns fora. I metun a jí proiec y scomenciadies cun le fin da mioré
demeztrú la cualité dla vita dles zitadines y di zitadins, da porté inant le
prozes de integraziun europeica y da tó y jí i confins, ince tl ce dles
porsones. I viun ci che nes liëia, le sté adöm en armonia y i metun dancá i
valurs che liëia y nia chi che despartësc.
Les desfides dl dagní, sides tl setur dla mobilité, dl transit, dla digitalisaziun o
dl mudamënt dl clima, ne s’archita nia söi confins di stac o dles provinzies y
nos orun ti jí pormez deboriada cun öna na usc y öna n’aziun. Imparé
deboriada y imparé un dal ater é nosc moto. Tl medemo momënt nes stál
ince a cör nüs tröc proiec y les tröpes scomenciadies por i jogn tl ciamp
cultural o dles politiches soziales. Dilan propi a dötes chëstes ativités
chersciunse deboriada sciöche sozieté y i sun bogn da arjunje un de nüsc
obietifs prinzipai: chël da ti pité n valur implü ales zitadines y ai zitadins.
Gnide a descurí l’Euregio tres nosc sit web. Chiló ciafarëise düc nüsc proiec,
nostes scomenciadies, news y i evënc, sciöche ince i iadi audiovisifs fora por
nüsc teritori y tröp d’ater.
Por stlüje jö orunse recordé les parores de Richard von Weizsäcker (15 aurí
1920 † 31 jená 2015), le sest Presidënt dla Republica Federala Todëscia:
"Ara n’un vá nia dl sposté confins, mo da ti tó chë pert che despartësc les porsones".
Y porchël: fajunse sö deboriada l’Euregio Tirol-Südtirol-Trentin, ciodiche
l’Euregio sunse düc nos!
Üsc Presidënc Euregio Anton Mattle, Arno Kompatscher y Maurizio Fugatti