I campions del Euregio: 24 medaes ventes a la Olimpiades

L President del Euregio e capitan del Tirol Anton Mattle, adum coi presidenc de la Provinzies Autonomes de Trent Maurizio Fugatti e de Busan Arno Kompatscher e ai assessores al sport Philip Wohlgemuth (Tirol), Mattia Gottardi (Trentin) e Peter Brunner (Sudtirol), à sotrissà l zis bon resultat arjont: jan sorafora la seides di confins, i teritories del Euregio met adum sia tradizions fones per l stravardament di sport da d’invern. Atletes e atlec olimpics à desmostrà abilitèdes, gaissa e determinazion. De bie complimenc i ge vegn sporc a duc i partezipanc del Euregio: con sia prestazions i à regalà momenc maraveousc, ence de gra al empegn e al lurier de endrez fat da sacotanta persones e da la organisazions sportives.

Da ades se pel se recordèr de la storia olimpica ti teritories del Euregio ence aló dal Euregio Infopoint de Dispruch: la mostra digitèla interativa, de fat, enstadì la é stata smaorèda con na sezion dedichèda a la Olimpiades. 
L’inaudazion la é stata fata ai 3 de firé, olache à tout pèrt l vizepresident tiroleis Wohlgemuth ensema al curador Christian Rainer, Matthias Egger (Archivie comunèl de Dispruch), i dozenc de la Università de Dispruch Kurt Scharr e Wolfgang Meixner e l Secretèr Generèl del Euregio Matthias Fink. 

La neva sezion de la mostra met al luster i Jeghes Olimpics da d’invern del 1964 e del 1976 de Dispruch e la ge dèsc lèrga ai suzesc maraveousc e a evenc, vèlch outa ries, de atletes e atlec del Tirol, Sudtirol e Trentin da la pruma Olimpiades scin anchecondì. Ti meisc che vegn la informazions les vegnarà integrèdes con cheles di Jeghes Olimpics del 2026, co la neva che, de gra a la garejèdes de biathlon a Anterselva e a la disciplines nordiches te Fiem, i teritories del Euregio, pel se definir sentes olimpiches. 

Ai Jeghes Olimpics da d’invern à tout pèrt 124 atlec en dut del Euregio, avisa 41 del Tirol, 47 del Sudtirol e 36 e del Trentin. L resultat del Euregio l é n muie balanzà: i atlec e la atletes del Sudtirol à arjont 15 medaes, do ge vegn do a roda sie coleghes e sia coleghes trentins e tiroleisc, con 14 medaes per delegazion; 11 la medaes ventes da la eles, 18 dai omegn. 

L dombrament de la medaes arjontes dal Euregio se pel l comparèr demò en pèrt con chel olimpich ofizièl: da na man l Euregio l à vent n podie per ogne garejèda, apontin descheche vegn fora da chel de la medaes ofizièl. Te chest cajo, ge vel tegnir cont che te la garejèdes a squadres e te la stafetes i atlec del Euregio spartesc adum en pèrt la medaes coi etres comembres de la federazions sportives taliènes e austriaches. 

Te na prospetiva personèla, l Euregio à ence dombrà ogne medaa per persona. Te la garejèdes a squadres e te la stafetes chest vel dir che l Euregio à vent n numer più aut de medaes, a pat che amancol doi atlec del Euregio i sie jic sui sciaires del podie. 

Te la enjonta: regoeta de la medaes e campions. 

Traduzion di Servijes Linguistics e Culturèi del Comun general de Fascia

(cdt)