BULSAN (USP). I/la cueghes dl pruiet culiner "Euregio pra mëisa" ie ai 7 de mei stac tl zënter de n evënt urganisà dal’Euregio Tirol-Südtirol-Trentin tla Fiera de Bulsan. L ie unì prejentà dodesc cëifs raiunei preferii che 12 chefs – cater per uniun di trëi raions dl’Euregio – à njenià y njenierà ca per n publich lerch ntan la cater sajons dl 2025. Chësc fej deventé l pruiet, nasciù sot ala Presidënza de Südtirol, un di pruiec de comunicazion plu lerc y lonc di 14 ani de storia dl’Euregio.
Cësadafuech raiunela tën cont dl’economia y dla sustenibltà
Coche à auzà ora i reprejentanc dl’Euregio tla ntervistes de ntroduzion, ie la finamira dl pruiet chël de auzé ora la mpurtanza dla cësadafuech tradiziunela rica dl Tirol, Südtirol y Trentin. "La cësadafuech dl’Euregio mët adum i miëur ngredienc de nosc raions per fé n cëif unich. L ne n’ie nia mé n simbol de nosta unità tla desferënzia, ma nce n fator economich. Cun l’'Euregio sun mëisa' vëniel giaurì la streda per na cësadafuech sustenibla," da coche à dit l presidënt dl’Euregio y de Südtirol Arno Kompatscher.
Per l assessëur trentin per la prumuzion dla cunescënza dl’Autonomia Simone Marchiori, prejënt per l’ucajion, "uel l’Euregion ti dé vijibltà al’identità culturela y storica de nosc raions, crian sinergies nueves; cun chësc pruiet iel unì ativà na cunlaurazion mpurtanta danter la trëi lies di cueghes dl’Euregio."
Günther Platter, un di fundadëures dl’Euregio y per truep ani alalongia Landeshauptmann dl Tirol, à dat da lecurdé l ubietif uriginer dla cunlaurazion scialdi bona: "Son cuntënt che i videos lasce udëi nce i autri dodesc pruiec dl’Euregio, ora che chël dl cujiné. I mostra tan de ideies de valor che ie deventedes realtà dala fundazion dl 2011 incà."
Pra la mëisa turonda à i trëi presidënc dla trëi lies di cueghes Patrick Jageregger per l Südtirol, Stefano Goller per l Trentin y Philipp Stohner per l Tirol prejentà i ubietifs dl pruiet. Oradechël à la cueghes de 'Euregio sun mëisa' Tina Marcelli y Madlen Hackl cuntà de si esperienzes persuneles ntant che les univa tëutes su tres video y de si percurs tl setor dla restorazion de livel aut.
Dodesc puntates te TV, radio y online
Tl 2025, da fauré nchin ala fin dl ann, vën la 12 puntates lascedes udëi dai partners tv y radio de duc i raions dl’Euregio te ntervai de n valguna enes. L fej pea 12 chefs, cater per uniun di trëi raions dl’Euregio Tirol-Südtirol-Trentin, che cumpanieia l publich tres la cater sajons cun si 12 cëifs raiunei che i à l plu gën. Uni espisoda dà nce inant nfurmazions nteressantes n con’ dla storia, dla cultura y di pruiec dl’Euregio.
Do la trasmiscion tl prim vën pona i videos y i pultrëc di cueghes, la rezetes y d’autra nfurmazions publichei sun la plata internet So isst Euregio.
gst/dl