La 25 aziendes y i criatifs dl'Euregio Tirol-Südtirol-Trentin che se à candidà per la VII edizion dl Pest Inuvazion dl'Euregio messova se cunzentré sun la nteligënza artefiziela, la tematica purtanta di Dis dl'Euregio 2024 che ie unii metui a jì a Alpbach tl Tirol. N sada ai 17 de agost iel unì cunedì chiche ie ruvà te finela y à venciù, danter la sies realteies plu inuvatives n con’ de prudot, pruzes o servisc. La majera mprescion ala iuria ti àl fat Waterjade Srl dl Trentin, sot ala direzion dl diretëur dla agentura cun sënta tl Tirol, Marcus Hofer. Segonda y terza ie ruvedes la dites Dibit Messtechnik GmbH dl Tirol y GeoInference Srl dl Trentin.
La zeremonia de premiazion ie unida fata n vëies dl Di dl Tirol pra l Zënter di Cungresc Alpbach cun la prejënza dl presidënt dl’Euregio y dla Provinzia de Bulsan Arno Kompatscher, dl capitan dl Tirolo Anton Mattle y dl assessëur dla Provinzia de Trënt Simone Marchiori. L pest ie patruzinà dala Cameres de Cumerz dl Tirol, de Bulsan y de Trënt, cun i presidënc de chëles che se à dit cuntënc per la truepa candidatures unides ite. Barbara Thaler dla Camera de Cumerz dl Tirol à detlarà: "L'inuvazion fej sambënzënza unì plu stersc, y perchël iel drët fé prumuzion limpea te Europa.”
Michl Ebner dla Camera de Cumerz de Bulsan à da si cont lecurdà la “putenzialiteies zënza sëides y utles dla nteligënza artefiziela, che possa fé a na maniera che l’aziendes dl’Euregio sibe njeniedes per la ndesfidedes dl daunì.”
Thaler y Ebner à sotrissà che l sustëni a svilups dl daunì di raions ie la gauja per chëla che la trëi Cameres de Cumerz à sustenì l Pest Inuvazion.
L presidënt dla iuria y aministradëur delegà dla “Standortagentur Tirol”, Marcus Hofer, ie cuntënt che chësta edizion ebe abù n tel suzes: “I pruiec premiei desmostra che l’aziendes dl’Euregio ne n’ie nia mé trates ite da chësta tematica tan mpurtanta per l daunì, ma che les ie tlo monce prutagunistes.”
La aziendes cun sënta tl’Euregio à pudù fé pea pra l cuncors dl Pest Inuvazion Euregio cun prudoc, pruzesc o servijes tres chëi che i à fat prumuzion per l’inuvazion tl ciamp dla nteligënza artefiziela per si azienda y/o per si tlienc. I prim trëi pruiec crisc ora y che à nscila venciù giaperà damprovia 10.000, 5.000 e 2.000 euro: l mez de chësta soma ie metuda adum dai servijes PR metui a despusizion dala agenzies “Trentino Sviluppo”, “IDM Südtirol” y “Standortagentur Tirol”.
LPA/gst/dl