L’EuregioFamilyPass vel engaissèr duta la families de l’Euregio Tirol Sudtirol e Trentin a cognoscer e viver diretamenter l’Euregio. La perferida per l temp ledech de la families la tol ite evenc spezifics, rebasc ti setores de l’istruzion, de la cultura e del sport enscin a la mobilità slejierida per viajèr con mesi publics. Per portèr dant duta la perferida a na vida scempia e chièra, l’é stat endrezà na mapa interativa de l’EuregioFamilyPass per duc, che ades la vegn metuda dant dai assessores per la families de l’Euregio, che fossa cheles del Land Tirol, de la Provinzia autonoma de Busan e de la Provinzia autonoma de Trent.
La mapa interativa neva ge moscia a la families duc i vantajes che les pel aer con l’EuregioFamilyPass, i despiega i assessores per la familia. Per l’assessor a la familia de la Provinzia autonoma de Trent la mapa l’é n strument sorì per la families no demò per cognoscer e se emprevaler de la perferides de sie raion, ma ence per cognoscer cheles di etres doi raions de l’Euregio. Per l’assessor l nef strument miorarà amò de più l barat de esperienzes anter i trei raions. La mapa interativa con funzion de enrescida di partner convenzioné doventa ence n vèrech emportant per la digitalisazion. La mapa interativa de l’EuregioFamilyPass la é sul sit www.familypass.eu.
Program Interreg per l bardat sora fora la seides
L projet EuregioFamilyPass l fèsc pèrt del program Interreg Tèlia- Österreich. Dal 2017, delaìte de chest projet l’é stat svilupà n sistem de arvejinament medemo per duc, per ge sporjer a la families del Tirol, del Sudtirol e del Trentin na perferida familièra grana e portèr inant l barat culturèl sora fora la seides.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
(cdt)