DISPRUCH (USP). Per si fé ezelënt per l bën dl raion à ai 20 de fauré i doi presidënc Anton Mattle (Tirol) y Arno Kompatscher (Südtirol) unerà undesc persunaliteies dl Tirol y de Südtirol cun la bedaia d’unëur dl Land Tirol. De Südtirol à la presidënta dl’Università Ulrike Tappeiner, l curat diozejan dla families Toni Fiung y l artista Gotthard Bonell giapà la uneranza de prestisc. Chësta ie una dla majeres dl raion y ti vën data a al plu dodesc persunaliteies al ann. La palëta di unerei va dal’ert y dala cultura tres l’economia y l turism nchin via tla medejina, la scienzia, l soziel y i media.
“I unerei de ncuei ie na desmustrazion de si vester despunibli per arjonjer traverc, de se nfidé y de ulëi sëurantò respunsabltà. I ne n’ie nia mé ambasciadëures dl Tirol y de Südtirol, i à nce fat unì stersc nosc raions, cun si atività,” à sotrissà l cumandant dl Tirol Mattle. Do la zeremonia de lecort sun l Bergisel per l 216ejim di dala mort de Andreas Hofer iel stat la sëurandata n prejënza di doi ejecutifs raionei, di doi parlamënc raionei y de d’autri reprejentanc dl Tirol y de Südtirol tl Gran Self dla Hofburg a Dispruch.
Ejëmpli per Tirol y Südtirol
"L ie na ispirazion a udëi coche la pascion ndividuela y l mpëni de uniuna arichësc nosta cumenanza. La uneredes y i unerei ie ejëmpli ezelënc per Tirol y Südtirol: i mët adum respunsabltà, savëi y criatività y mostra su tan truep che na persona sëula possa arjonjer per la cumenanza. Nëus son capazi de pudëi uneré si arjontes,” à dit l presidënt dla Jonta provinziela Arno Kompatscher ntan la festa.
Kompatscher y Mattle ti à sentì gra ai unerei per si prestazions per la sozietà. “Chiche se sëurantol respunsabltà tl’ert, tla cultura, tl’economia y tl turism, chiche ie bon de nvië via stredes nueves limpea, chëi renfurzea nosc raion. Chësta andes y chisc berbesc ie ejëmpli mpurtanc che fej deventé l Tirol na tiera ulache l ie bel a viver y che cëla de viers dl daunì. I ne à Tirol nia mé te si cuer, i porta nce ora tl mond nosta tiera, cun duta si ezelënzes,” nscila Mattle.
Deplü informaziuns
La bedaia d'unëur dl Land Tirol à giapà undesc persunaliteies
DISPRUCH(USP). Do l lecort a Andreas Hofer sun l Bergisel y tla Hofkirche à undesc persunaliteies di ciamps dl’economia, dla cultura, dl jurnalism nsci coche dla religion y dl soziel giapà la uneranza. Partii su nscila: na ëila y doi ëi de Südtirol, trëi ëiles y cin’ ëi dl Tirol. I doi presidënc Arno Kompatscher y Anton Mattle se à cungratulà pra chësta persunaliteies uneredes:
Gotthard Bonell, artista y moler
Toni Fiung, preve y curat de familia
Maria Grander, truep ani alalongia presidënta dla lia “Selbsthilfe Tirol”
Christof Grassmayr, senior dla mpreja Grassmayr
Magdalena Hauser-Seibl, diretëura tl Bio-Hotel Stanglwirt
Alfons Parth, turistich y mprenditëur
Hans K. Reisch, cumëmber dl diretif de SPAR Österreich
Alois Schranz, chirurgh de desgrazies y fundadëur de Medalp Imst
Univ.-Prof.a Ulrike Tappeiner, ex-presidënta dla Università Liedia de Bulsan
Franz Tschiderer, truep ani alalongia sëurastant dla lia de turism Serfaus-Fiss-Ladis
Mirjam Weichselbraun, muderadëura TV, atëura y sincronisadëura
pio/red
Downloads & Links
20260220_Laudationes_Ehrenzeichen_VERSAND.pdf (160 KB) Laudationes zur Verleihung der Ehrenzeichen 2026. Land Tirol |