Con na prejentazion interativa ad hoc per i scolees de la Scola Ladina de Fascia dintornvia la cooperazion sora la seides fora, la storia, la desvalivanza linguistica e argomenc de enteres per la realtà de l’istituzion e del teritorie, l projet “Euregio incontra le scuole” l é ruà te Fascia, olache no l é stat besegn de despieghèr la desvalivanza linguistica, ajache chesta la vegn vivuda duc i dis da scolees e ensegnanc. A la prejentazion, per doi lengac, à tout pèrt con gaissa bec e bezes de quinta de la Scola populèra de Sèn Jan. “Esperienza dassen enteressanta e rica de oportunitèdes da poder lurèr fora”, l’à dit l’ensegnanta de todesch Fernanda Favè. “L é stat na ocajion per se baratèr esperienzes un col auter: endèna che l’ensegnanta se confrontèa con sie scolees, gé despieghèe tant per talian che per todesch la desferenza anter i desvalives lengac de mendranza che l é sun nosc teritorie”, l’à dit Roberta Tomazzoni del Ofize Euregio de Trent, che encomai da dotrei egn en ca la porta dant chesta atività te duta la scoles che fèsc domana tel scomenz del an de scola.
Traduzion di Servijes Linguistics e Culturèi del Comun general de Fascia
(cdt)