Parola ladina dl’edema

Scumencian dai 26 de setëmber, l Di Europeich dla Rujenedes, puderan liejer uni ena, n ann alalongia, n’autra parola ladina ti canai de comunicazion defrënc de lies, istituzions y media ladins y nia ladins. L travert dl proiet “Parola ladina dl’edema“ ie de renfurzé la cuscienza per la rujeneda ladina, de nvië a na maniera lesiera y plajëula a tò ca cërta paroles ladines y de ti purté daujin la rujeneda ladina nce a jënt che ne rejona nia ladin.

Na lista cun 52 paroles ie unida metuda ju da na grupa de lëur cun reprejentantes y reprejentanc dla valedes ladines y de istituzions defrëntes: Isabella Marchione (Istitut Ladin Cesa de Jan, Fedom), Alessandro Margoni y Stefano Dorich (Olfed y Istitut Ladin Majon di Fascegn), Pietro Gaspari Bandion (Ampëz), Erika Pitscheider (Istitut Ladin Micurá de Rü, Val Badia), Ruth Videsott (Università de Bulsan) y Sofia Stuflesser (Ciamp pedagogich dl’Intendënza y cultura ladina, Gherdëina), che à nce coordinà la scumenciadiva. L ie unì cris ora de bela paroles ladines che vën suvënz giamiedes ora cun paroles fulestieres, paroles che manacia de unì desmincëdes, paroles spezifiches ladines y neologisms. La prejentazion vën fata cun test, imaja, grafica o video – for ti cin idioms ladins y tl ladin standard cun traduzions tl rumanc, furlan, tudësch, talian y nglëisc. La grafica ie unida fata da Simon Perathoner.

Per la defujion tres i social media vëniel metù a despusizion n format uniter, che possa unì adatà individualmënter dala urganisazions che fej pea. Cun elemënc interatif coche dumandes o nvic a fé pea (p. ej. publiché fotos o cumentares) dëssel unì trat ite la cumenanza tl proiet y ngrandì la vijibltà dla rujeneda ladina.

“L proiet ‘Parola ladina dl'edema’ reprejënta n puent culturel: l permët de ti purté daujin nosta rujeneda a chi che ne n’ie nia ladin y, tl medem mumënt, de mantenì vif l patrimone de valor de nosc antenac danter la jënt ladina“, sotrissea l'Assessëur Provinziel per l'Istruzion y la Cultura ladina, Daniel Alfreider.

L diretëur dl’Intendënza y Cultura Ladina y ideatëur dl proiet André Comploi auza ora: “L proiet ‘Parola ladina dl‘edema‘ ie n ejëmpl per la bona cunlaurazion y sinergia danter istituzions, lies y media. De valor ie dantaldut nce l sustëni de partner coche la Lia Rumantscha y la Societât Filologjiche Furlane, che valorisea coche nëus la pluralità y vitalità dla rujenedes de mendranza. Mé tres chësta cunlaurazion strënta iel mesun ti dé vijibltà ala rujeneda, arjunjan duta la generazions, y judé pea a mantenì l lingaz ladin nce tl daunì.“