BULSAN (USP). N va inant cun i lëures per njenië ca i Juesc Olimpics da d’Inviern. Te Südtirol uniràl tosc metù a jì la garejedes de biathlon de Antholz. La Provinzia autonoma de Bulsan fej la sia. Do la senteda dla Jonta provinziela de Bulsan n vënderdi ai 30 de jené à l presidënt dla Jonta provinziela Arno Kompatscher y l assessëur provinziel per la Mubltà Daniel Alfreider, deberieda cun l diretëur de Repartizion per la Nfrastrutures y la Mubltà Martin Vallazza, dat nfurmazions mpurtantes n con’ dla maniera per arjonjer la Südtirol Arena Alto Adige de Antholz.
N uel se tenì cun cuerënza pra i criteres strategics dla Jonta provinziela y “garantì la mubltà sustenibla; chësc resta tl zënter de nosc fé nce n ucajion di Juesc Olimpics: perchël ulons fé a na maniera che i pasciunei y chiche va a cialé pro posse ruvé permez cun i mesuns publics sibe pra l mplant de Antholz che pra i mplanc daujin de Cortina, Pardac y Bormio,” à dit l presidënt dla Jonta provinziela Arno Kompatscher.
Jan ite plu tl detail à l assessëur provinziel Alfreider auzà ora “la mpurtanza de fé jì bele dan l terminn calculà la ferata de Puster, che resta la roia prinzipela per se spusté de viers de Antholz." Per arjonjer la Südtirol Arena Alto Adige “iel unì ativà 66 curieres sëuraprò y 10 shuttle che ti lascia pro nce a persones cun dejablteies de jì a ti cialé ala garejedes: l ie fundamentel che l vënie garantì la zircumstanzies acioche duta la jënt posse ruvé permez pra la garejedes olimpiches. Da chësc pont de ududa me stàl a cuer sotrissé che nce la plata internet de nfurmazion de STA vën ajurneda te cater rujenedes, a na maniera che duc posse se nfurmé.”
De viers dla Südtirol Alto Adige Arena
L diretëur de Repartizion per la Nfrastrutures y la Mubltà Martin Vallazza à prejentà n valgun resultac de analises, aldò de chëles che l ie unit ora che ntëur al 50 percënt de chiche cëla pro jirà cun i mesuns de trasport publich a ti cialé ala garejedes. Da permò iel unì giaurì da nuef la ferata de Puster, cun chëla che n possa ruvé pra la stazion de Valdaura. Dala stazion demez zirculea ntan i diesc dis de garejedes la linia dla curieres 431, fajan paië la tarifes reguleres. Te chësc cajo sarà la ultima fermeda chëla de “Wildgall”. Oradechël puderàn se n nuzé dla curieres shuttle A, B y C nchin a Mitterantholz, debant per duc.
Sun la plata internet de STA-Strutture Trasporto Alto Adige SpA giàtun nfurmazions sibe n con’ di orares che n generel, ma n possa tlo nce cumpré la chertes de ntreda.
De viers dla sëntes de Pardac, Cortina y Bormio
Per ruvé pra la sënta de Pardac vëniel cunsià de jì cun la ferata nchin a Auer y de jì da iló demez inant cun la linies 140 o B101, cuordinedes danter la Provinzies de Bulsan y de Trënt, o cun la curieres shuttle debant. Per ruvé a Cortina vëniel cunsià de jì n iede a Toblach cun la ferata y de jì da iló demez cun la curieres shuttle a paiamënt. Per ruvé pra la venue de Bormio iel unì renfurzà i servijes dla curieres y di shuttle dla Venuesta.
I raions ulache n possa ite mé cun l pass auto
Per ruvé ite te Antholz ntan i dis de garejeda vàl n droa n sistem da 3 raions che regulerà l trafich ntan dut l tëmp di Juesc: la nfurmazions n con’ dla regulamentazion dl trafich ie tlo.
Curiera shuttle per persones cun dejabltà
Per la persones cun dejabltà iel preudù n servisc de shuttle aposta. Mpurtant: l servisc muessa unì prenutà online bele danora y ie resservà estlujivamënter ai vijitadëures che à cumprà na cherta de ntreda per persones cun dejabltà. Per prenuté l servisc pòssun vijité tlo la plata internet Milano Cortina.
Ulà lascé l auto: la plazes dai auti cunsiedes
Sce l ie puscibl vëniel cunsià de jì a ti cialé ai Juesc lascian a cësa si mesun privat de trasport. Sce l ne n’ie propi nia mesun, iel a despusizion 2.000 lueges da lascé l auto a Toblach per jì pona inant cun i shuttle nchin a Cortina, 1.400 lueges te Antholz y 700 lueges a Valdaura.
gm/red