L Cunsëi di Chemuns dl’Euregio à abù aldò dl turnus si ultima senteda cun n presidënt de Südtirol. Pra la senteda tla sënta dl’Euregio a Bulsan ie l presidënt dla Lia di Chemuns dl Tirol Karl-Josef Schubert unì numinà tla ncëria de suzescion per Andreas Schatzer, che à abù chësta ncëria doi ani alalongia coche reprejentant dla Lia di Chemuns de Südtirol. Dlongia la sëurandata simbolica fòvel tl zënter la prejentazion de criteres per avisé l’Euregio.
L presidënt dl’Euregio, l presidënt dla Jonta provinziela de Bulsan Arno Kompatscher, à rengrazià per la cunlaurazion costrutiva nchinamò, che l spera posse jì inant nce tl daunì: I Chemuns à l cuntat plu ndrët cun la jënt. Coche elemënt de liam dl’Euregio ons tl 2021 metù su l Cunsëi di Chemuns. I criteres nueves per avisé l’Euregio dëssa renfurzé chësc liam nce ti cuntenuc.”
Schatzer ti cëla de reviers ala presidënza de Südtirol: „Cun la brosciura dl’Euregio per cunselieres de Chemun, l di di Chemuns dl’Euregio cun la tematica dla digitalisazion y cun i jumblinajes danter Chemuns ie la funzion y la fazion di Chemuns unides renfurzedes te na maniera sterscia coche seva che porta l’Euregio.”
Per Schubert ie per i doi ani che vën dantaldut n manejamënt cuncret de mpurtanza: “Ulon che nosc pruiec sibe ades da tuché cun man, che i posse dé sustëni y pité l mesun de fé rë. L spirt dl’Euregion dëssa vester prejënt te uni sala cunseliera di Chemuns de dut l Tirol.”
Criteres per avisé l’Euregio laurei ora per i Cunsëies de Chemun
Cun l manual di criteres per avisé l’Euregio, njenià ca per i y la cunselieres de Chemun, giapa chëstes y chisc n urientamënt n con’ dla storia, dl svilup, dla strutures y dla ncëries tl’Euregio Tirol-Südtirol-Trentin.
L manual dla diretives per la cunlurazion danter Chemuns prejënta pruiec zentrei, ponc fundamentei y ndesfidedes, ma dà nce nfurmazions pratiches per l svilup cumenel, mé per dì pra programs UE de sustëni che ie bele danman.
La brosciura ie unida data ora tl cheder dl pruiet Interreg “Njeniei per la cuoperazion” (Fit4Co) sot ala cuordinazion dla Lia di Chemuns de Südtirol deberieda cun la Lies di Chemuns dl Tirol y dl Trentin.
Cumembranza plëina per i ladins da Souramont
L Cunsëi-Euregio di Chemuns à dat pro la pruposta de n mudamënt de statut: la aduneda Euregio dëssa ai 25 de setëmber ti cunzeder ai Chemuns ladins de Fodom, Col y Anpezo, che ne n’ie nia laite tla sëides dl’Euregio, na cumembranza plëina tl Cunsëi di Chemuns dla Euregio.
Pona iel mo unì prejentà l pruiet „Legitimult– legitimate crisis governance in multilevel systems”. L analisea l manejamënt de crisa tl’aministrazions publiches. Svilupà iel unì dala Eurac Research Bulsan tl cheder dl program Horizon-Europe-Programms.
gst/dl