SALURN (USP). Cun la sëurandata dla tle al Tirol ie ai 25 de setëmber a Salurn finedes via la ultima sentedes dl diretif y dl’adunanza dl’Euregio sot ala presidënza de Südtirol.
Te si retrospezion de viers dla presidënza da pert de Südtirol, che à scumencià ai 1. de utober dl 2023 per finé via ai 30 de setëmber dl 2025, à l presidënt dl’Euregio Tirol-Südtirol-Trentin Arno Kompatscher, che ie nce presidënt dla Jonta provinziela de Bulsan, auzà ora l moto de ti vester ala sëides:”Ti jì permez al rie, fé zeche de nuef y jì inant cun chël che ie stat bon: chësc ie stat l travert dla Euregio sot ala presidënza de Südtirol. Deberieda iesun stac boni de passé sëura d’autra sëides via!”
Politicamënter iel stat n mpëni tresora de jì a crì soluzions per l’arteria dl trafich tres la Elpes. Coche pruiec de majera mpurtanza pona nce realisei à Kompatscher auzà ora l Meteo Euregio, l Ann Euregio di Museums 2025 y l pruiet de film y de culinaria “Nscila maia l’Euregio”. Per mëter n droa l Ticket Euregio y la Borsa di mestieres ie i majeri organns dl’Euregio n juebia stac boni de mëter na fundamënta mpurtanta (LINK: cëla nce l articul USP a pert).
Te truep ciamps coche familia, junanza, cultura y tueda cun nrescida ma nce tla mubltà y segurëza tla Elpes àn scumencià o iesun jic inant cun suzes cun pruiec Euregio. Deberieda cun urganisazions partners y l’aministrazions di trëi raions dl’Euregio àn nvià via de ndut 181 scumenciadives.
L capitan dl Tirol Anton Mattle, che sëurantol la presidënza Euregio aldò dla rutazion, à prejentà l moto de si presidënza “Forza zënza sëides – deberieda!” y à dit che l uel mantenì na cërta cuntinuità: “Südtirol à metù a despusizion ufertes nueves coche la borsa di mestieres y l ticket de mubltà. La presidënza dl Tirol uel brancé ite propi iló y ti à crëta ala forza zënza cunfins dl’Euregio.”
L presidënt dla Jonta provinziela de Trënt Maurizio Fugatti, n ucajion dla senteda reprejentà da si vize Achille Spinelli , à rengrazià l raion de presidënza che ie stat nchinamò: „Cun si presidënza à Südtirol dat mpulsc sëuraprò per na Euregio unificheda y recunesciuda, che à ntant arjont n status de motor sterch per la cunlaurazion tla Elpes, cun na vijion che va de viers dl daunì.”
gst/dl