SALURN (USP). I terminns per la Borsa di mestieres metuda su da permò y per l Ticket dl’Euregio che fova bele unì cunedì ie ntan unii fissei. L presupost per la doi scumenciadives ie per i doi pruiec dla presidënza de Südtirol unì metù dala presidënza dl’Euregio y dala aduneda dl’Euregio te si sentedes ai 25 de setëmber tla Cësa Noldin a Salurn.
Borsa di mestiere dl’Euregio
Dai 1. de mei dl 2026 inant puderà zitadines y zitadins te duc i raions dl’Euregio Tirol-Südtirol-Trentin crì da lëur sëura la sëides ora, mprejes puderà scrì ora stieres liedies. Dut chësc sarà mesun de gra ai portai de lëur alle jobs de “Arbeitsmarktservice Tirol”, eJobBörse per Südtirol y Trentino Lavoro. Tlo se giamieia l’aministrazions cumpetëntes si ufertes de lëur, da coche à dit l presidënt dl’Euregio, l presidënt dla Jonta provinziela de Bulsan Arno Kompatscher tla cunferënza stampa do la sentedes deberieda cun l capitan dl Tirol Anton Mattle y l vizepresidënt dla Jonta provinziela de Trënt Achille Spinelli. Nscila ti dàn na majera vijibltà al marcià de lëur nce ti autri raions dl’Euregio. N se aspieta nscila che l sibe pona mesun arjonjer deplù jënt canche l vën scrit ora cuncorsc, deplù mubltà dla laurantes y di lauranc y na majera cuncurenzialtà. I details unirà fac a l savëi per tëmp y ëura dan che la Borsa jirà online.
Ticket Euregio
L ie nce unì arjont n’acurdanza per mëter n droa l pruiet dl Ticket Euregio, dajan bele dant l terminn avisa: dai 15 de dezëmber inant pòssun viagë cun n abunamënt sëul cun la ferata, la curiera y i mplanc portamont te Tirol, Südtirol y l Trentin. L abunamënt costa 750 euro y ie nscila scialdi plu a bon marcià che i trëi abunamënc anuei di trëi raions deberieda. L ie metù adum dai doi abunamënc che l ie bele per l Tirol, cun l tlimaticket, y Südtirol, südtirolmobil Fix365 tl design Euregio, che ie nce recunesciui te dut l raion dla mubltà raiunela publica tl Trentin. N puderà l cumpré sun la plates web di „Verkehrsvertriebe Tirol (VVT)“, de südtirolmobil dla “Strutures de Trasport de Südtirol AG (STA)” y da “Trentino Trasporti“.
L ie nce unì prejentà la cuverta dl ticket, cun l logo dl’Euregio, i trëi blasons raiunei y la scrita „Ticket-Euregio“, deberieda cun i mesuns de trasport stilisei dla ferata, dla furnadoies portamont y dla curieres sun la pert danca y la cherta Euregio dovia.
I doi organns plu auc dl’Euregio à nce dat pro la pruposta de bilanz y l program de lëur 2026. Oradechël giapa i Chemuns ladins de Souramont, Fodom, Col y Anpezo deberieda la cumembranza ntiera tl Cunsëi Euregio di Chemuns.
gst/dl