Discuscions en cont de “Vera e pèsc te l’Europa”, dintornvia i fondamenc de l’Euregio Tirol-Sudtirol-Trentin e l met de tor pèrt al Forum european de Alpbach: l’Academia de l’Euregio sporc chest e auter. La se ouc a joegn anter i 18 e i 35 egn che vegn da duc i teritories de l’Euregio che vel miorèr sia cognoscenza de l’Euregio e fèr ence na esperienza sora la seides fora – estra apede l é de utol per l curriculum personèl. Per dut chest, i 30 partezipanc se scontrarà donca per trei fins de setemèna te un di trei teritories. Estra che jir a fon de che che l é l’Euregio, ge vegnarà dat lèrga a momenc de barat de pensier e idees con esperc e persones che à encèries de gran responsabilità. Se pel se enscinuèr a l’edizion de chest an dant che vae fora i 19 de mei sul sit de l’Euregio a la direzion www.euregio.info/academy. “Se trata – sotrissea l president de la Provinzia autonoma de Trent e president de l’Euregio te chest moment Maurizio Fugatti – de na oportunità preziousa per i joegn de fèr na esperienza formativa profescionèla e personèla e per cognoscer miec ambit e modalità de colaborazion anter i teritories de l’Euregio. Spere donca che sie sacotana enscinuazions a chesta scomenzadiva”.
“Veder l’Euregio con eies desferenc”
“L’Academia de l’Euregio ge dèsc l met ai joegn che vegn dal Tirol, Sudtirol e Trentin de jir tel fon de l’Euregio, de la cognoscer da vejin, de la vijitèr e, soraldut, de la viver tras desvaliva scontrèdes”. Do aer tout pèrt, i joegn vedarà l’Euregio con eies desferenc. Envie donca duc chi che à enteres a se enscinuèr a chesta ocajion de formazion”, à sotrissà l capitan del Tirol Anton Mattle.
Da Dobiach a Arco passan per Alpbach
Per se enjignèr a chisc seminaries, vegnarà endrezà doi webinar con lezions e momenc de discuscions. La pruma scontrèda de l’Academia de l’Euregio la sarà dai 30 de jugn ai 2 de messèl del 2023 aló dal Zenter culturèl de l’Euregio a Dobiach, tel Sudtirol e l’arà desche argoment generèl “Vera e pèsc te l’Europa”. La seconda la vegnarà endrezèda tel ambit del Forum european de Alpbach dai 17 ai 20 de aost del 2023 te chel che à inom “paese dei pensatori” tiroleis. Chiò l tem sarà chel de la partezipazion e la co-creazion te l’Euregio. Dai 17 ai 19 de november, l grop se binarà a Arco tel Trentin, olache vegnarà portà dant i fondamenc storics e giuridics de l’Euregio.
L cost per tor pèrt a duc i seminaries, tout ite magnèr, alberch e viac l é de 90 euro. I requisic per tor pèrt l é saer l todesch e l talian (livel linguistich B1 o più aut) e na curta letra te chela che se met dant la motivazion.
L’Academia de l’Euregio l é na scomenzadiva del GECT Euregio Tirol-Sudtirol-Trentin en colaborazion co la Fondazion “Alcide De Gasperi” e l istitut de enrescida “Eurac Research”.
Traduzion di Servijes Linguistics e Culturèi del Comun general de Fascia