L mpat dla nteligënza artefiziela (AI) de viers dl’Euregio Tirol-Südtirol-Trentin y di Chemuns ie stat prutagunista dl Di dl Tirol che ie stat n dumënia ai 18 de agost tl Forum Europeich de Alpbach (EFA).
Do la naugurazion y la festa de bënunì cun l presidënt dl'Euregio y dla Provinzia de Bulsan Arno Kompatscher, l capitan dl Tirol Anton Mattle, l presidënt dla Provinzia de Trënt Maurizio Fugatti y l presidënt dell'EFA Andreas Treichl, iel unì tenì l Euregio Summit tl Zënter di Cungresc de Alpbach: i esperc à purtà inant la descuscions n con’ de tematiches etiches, segurëza y mpat soziel y de coche l’AI possa unì nuzeda tl’aministrazions publiches.
Duc a una te si minonga: l’AI ie bele tl lëur de avëi na fazion y n mpat cuncret de viers dla sozietà, dl’economia y dl’etica. La ie na upurtunità per l'Euregio, ma la muessa unì valuteda te na maniera critica y urienteda tla pruspetiva drëta, se lascian sun prufesciunisć y se tenian pra i standards nternaziunei.
“La nteligënza artefiziela possa unì tëuta su cun n gran festide o cun n ntujiasm genuinn. La miëura maniera ie amez ite,” da coche à dit l presidënt dl'Euregio Kompatscher: ”L'AI possa miuré nosta vita y purté a bon fin problems che n ne cunësc mo nia. Danz che na maniera de ti jì permez al ‘uderon’ possa vester na manaceda, ajache la logica frëida dl’AI ne lascia nia pro cumprumisc. Messon definì criteres tleres da tenì ite y ne lascé mei da na pert l fator uman.”
L capitan dl Tirol à lecurdà che “per fé unì segur l anuzamënt dl’AI muessun se tenì dan ai uedli cuestions etiches y sozieles y ndividué manacedes putenzieles. Ma messon nce avëi l ardimënt de bracé ite ch’sta tecnologia nueva, che ie destineda a resté y no a se sfanté tl nia, y a la desfruté per nosc vantaje.”
L presidënt Fugatti se à dit dla cunvinzion che “sciche per uni cossa nueva cumporta nce l’AI upurtuniteies y manacedes y uniun/a de nëus ie cherdà/eda a la cunëscer y a avëi n cunsavëi plën de si viers.”
Tl Trentin àn scumencià cun la tueda y nrescida bele dan carant’ani cun l mëter mpën ncueicundì da pert dla Fundazion Bruno Kessler per soluzions al servisc dl mond di paures y dla produzion. "Son segur - nscila à finà via Fugatti - che nosc raion, de gra y cun la forza de si cumpetënzes, saverà da tlupé la upurtuniteies de chësta ndesfideda nueva y ti cialé al daunì cun ardimënt nuef y na gran ueia de fé.”
L'EuregioLab à metù man
L Di dl Tirol à nce fat scumencé l EuregioLab: ti proscimi dis se cunfrunterà n vint esperc n con’ dl anuzamënt dl’AI tl’Euregio.”
LPA/gst