Chi che l é bon de valutèr ghenao l risech levines l pel salvèr vites umanes, fajan referiment a racomanazions generèles, a fèr serèr la strèdes opuramenter, se l é debesegn, a meter a jir n'evacuazion.
L é de emportanza fondamentèla la colaborazion anter i ence desvalives, ence co na vijion che va sorafora i confins. Per miorèr la valutazion del risech te dut l raion de l’Euregio Tirol-Südtirol-Trentin, i raprejentanc de la comiscions levines di comuns di trei raions i se à binà en vender ai 18 de otober aló da la senta de l'Euregio a Busan.
La scontrèda l é stat ence n moment emportant per l projet Cairos Euregio, che l jirà inant enfin a l’aisciuda del 2026. L obietif l é chel de armonisèr e svilupèr amò de più i sistemes de lurier de la comiscions levines di trei teritories. Via per i ultimes meisc, n grop de esperc de la trei aministrazions, dessema coi fornidores di servijes del projet e co la comiscions levines de Prener e del Jouf de Sela – desche arees model transfrontalieres selezionèdes – l à lurà fora la modalitèdes per ruèr a arjonjer chest obietif e i resultac i è vegnui porté dant belapontin en ocajion de la scontrèda a Busan.
L confront l à permetù de binèr su spetadives, cruzies e idees, per integrèr l projet, olache se pel. L é n feedback emportant ence per l vèrech strategich che vegnarà fat per l projet Cairos, finanzià dal fon Fesr tel chèder del program Interreg Italia-Austria. Chiò defat se é do a svilupèr n software inovatif e pluringual, che l fae da strument plurifunzionèl per la documentazion, l'informazion e la comunicazion tel chèder del risech levines.
Atualmenter ti teritories de l’Euregio l é passa 2.000 comembres atives – per la maor pèrt volontères –
te 346 comiscions levines. Ti Comuns che tol pèrt al projet ic i deida valutèr l risech de levines e i porta dant si consees dantdaldut ai ombolc competenc per l teritorie, che i raprejenta l’autorità più auta de Protezion zivila a
livel de comun.
I resultac de Cairos i didarà dantdaldut la comiscions levines e la desvaliva istituzions de Tirol, Südtirol
e Trentin te so lurier, i sentadins de l'Euregio i vedarà i efec del projent demò per via endireta.
Aboncont, la colaborazion miora, i strumenc più neves e na formazion coche carenea i arà n efet che se podarà veder canche, per ejempie tel cajo de pericol de levines, se podarà serèr la strèdes a na moda prezisa e segura e de manèr fora na comunicazion a na maniera chièra.
Ufficio Stampa PAT