Da n pruiet de n film culinarich tres na uferta museala scialdi rica nchin via a viages scëmpli: tl ann de calënder 2025 à la Euregio Tirol-Südtirol-Trentin laurà pra passa 100 pruiec y scumenciadives sëura la sëides via. De ndut 35 ie unides metudes sot a scunanza d’unëur dla Euregio.
L Ann Euregio ie nce unì caraterisà dala sëurandata dla tle: ai 1. de utober iel unì mudà coche da turnus la presidënza da Südtirol ora tl Nordtirol, per doi ani alalongia.
L presidënt dl’Euregio, l capitan dl Tirol Anton Mattle, tira adum: „De gra al bon lëur sot ala presidënza de Südtirol à la Euregio pudù svilupé pruiec nueves, che dëssa tré adum mo deplù la jënt dl Tirol, Südtirol y dl Trentin. Nëus jiron inant cun chësta scumenciadives y ngrandiron mo deplù la uferta dla Euregio. Paralelamënter vàla de avëi na reazion sun mesura ala crises globeles y ala ndesfidedes dl raion. Dal mudamënt dl’energia tres l trafich de transit via nchin al marcià de lëur se cruzions y se mpenions cun forza per la miëura soluzions per la jënt dl Tirol, Südtirol y dl Trentin.“
Tematiches politiches dal Puent Lueg nchin ala lores y al lëuf
Nce a livel politich uel la Euregio jì inant deberieda. L presidënt dla Jonta provinziela de Bulsan Arno Kompatscher dà da lecurdé la tëmes che n ova dan scumencé cun i lëures de ressanamënt y derturamënt dl Puent Lueg. „De gra a nosc lëur de acord sons stac boni de schivé n szenario che se prejentova danora dut ntëur nce te na maniera reéla, chël de n caos de trafich decà y delà dal Prëner.”
Nce tla UE à na usc deberieda y n fla lonch purtà pro che n unissa scutei su deplù, njonta l l presidënt dla Jonta provinziela de Trënt Maurizio Fugatti: „Nscila ons for fat referimënt ai y mustrà su i gran problems che l sauta ora cun i gran tieres che zera tieres ti raions da mont. Che n à arbassà l status de scunanza pra la lëuf ie ënghe unit a s’l dé de gra a nosta ntervenzion. Drët ugà a tlo nosc Ufize de Referimënt, de chël che festejeron de nuvëmber l iubileum di 30 ani.”
Inant cun na „forza zënza cunfins“
Se stizan sun l moto de Südtiro „tò y tres sëides“ uel la presidënza dl Tirol mëter azënc sëuraprò cun l moto „Forza zënza sëides – deberieda!“, per mustré su y per fé sentì la storia deberieda, la cultura y identità deberieda y dantaldut i vantajes dla ufertes dl’Euregio per la jënt de nosc raion. Bele n ucajion dl Di dla porta davierta cun 20.000 vijitadëures fova n ucajion dl di naziunel austriach ai 26 de utober dl 2025 na gran spersa dla mostra tl Palaz raiunel a Dispruch dedicà ala Euregio. Oradechël iel unì scumencià tl Tirol cun na campania scialdi granda, che nvieia, cun formulazions aposta spizes y cun n gran valor de recunescimënt, a “rujené dla Euregio”.
Deplü informaziuns - Ann Euregio 2025 te na panuramica
Azënc
Dai 15 de dezëmber dl 2025 incà pòssen se fé dé, tres südtirolmobil pra la Assoziazions dl Trafich, l Ticket Euregio, che possa unì nuzà per duta la ufertes dl Assoziazions dl Trafich dl Tirol, de Südtirol y dl Trentin. La Borsa di Jobs dajerà al incontra l mesun che n posse crì da lëur te dut l raion dla Euregio, sëura la sëides ora.
D’autri azënc dl Ann de lëur dl’Euregio ie stac la lingia de films cun dodesc curtmetrajes culinarics “Nscila maia la Euregio” y l “Ann di Museums dl’Euregio”. Oradechël à la Euregio per l prim iede dat ora l Pest architetonich culturel dl’Euregio y metù a jì na mostra itineranta, n ucajion dl iubileum di diesc ani dl Calënder dl’Euregio. Na eserzitazion de meldefuech tl bosch metuda a jì deberieda cun joleri tl Osttirol à fat da proa sëura i cunfins ora tl cajo che l ëssa da suzeder zeche de chësc viers. Pra la Festa dl’Euregio a Burnech ti àn dat l majer pëis ala ancunteda cun la jënt.
De nuvëmber iel finà via l pruiet Interreg de doi ani, finanzià dala UE, dal inuem Fit4Co, che uel dì “Fit per la Cuoperazion”; tlo iel unì sustenì la cunlaurazion dl’aministrazions publiches y di partners soziei dla Euregio. D’autri mumënc de majera mpurtanza ie stac i Awards de Nfrusceda, Tueda y Nrescida, la Juebies de Cultura dl’Euregio a Bulsan y i Merdis dl’Euregio a Trënt, ma nce la ufertes per la junanza coche l SprintChampion, l SwimCup, l SportCamp y la Mujiga de strumënc a fla dla Junanza.
Plata internet dl’Euregio: do cater ani n iel ntant passa l dopl che va ite
Sce n ti dà na udleda a si canai de comunicazion vëijun te na maniera tlera che de gra al’atività for majera y majera iel chersciù nce l nteres per la Euregio: ntëur a 400.000 persones ie jic a crì nfurmazions sun la plata web www.europaregion.info, cun passa 681.000 clicks sun la plata, passa l dopl che no mo tl ann 2022, cun 286.000 clicks. L majer nteres iel stat per i pruiec (236.000), riesc do la News (163.000) y la plata Bruxelles (156.000). Nce cun ntëur a mile cuntribuc sun Facebook y Instagram coche cun passa 120 comunicac stampa à la Euregio nfurmà si zitadines y si zitadins.
2.500 vijites ala mostres
N cheder dla storia, dla cultura y dla ncëries dl’Euregio à oradechël giapà, cun n plus de 25% permez al ann passà, plu che 2.500 vijitadëures dla Mostra Interativa tl’Euregio-Infopoint a Dispruch, coche nce 1.200 sculées y sculeies cun l pruiet trentin „Euregio incontra le scuole“ (Euregio se anconta cun la scoles).
BULSAN/DISPRUCH/TRËNT (USP)
gst/dl