Presciapech 60 joegn che vegn da duc e trei i teritories del Euregio Tirol – Sudtirol – Trentin i tolarà pèrt al EuregioSummerCamp 2022 che chest an l vegn endrezà a Sèn Valantin, col dit “Natura scontra Cultura”. La setemèna de ativitèdes che la se serarà su ai 14 de aost la é tachèda ofizialmenter en domenia ai 7 de aost con na curta zerimonia endrezèda via per l domesdi.
Per l president del Euregio e de la Provinzia Autonoma de Trent, l é n event che desmostra l voler de chesta organisazion de ge dèr l met ai joegn de cognoscer miec la oportunitèdes perferides dal Euregio e proèr de persona che che l é chesta colaborazion che va sorafora la seides. Per l Secretèr Generèl del GECT Tirol – Sudtirol – Trentin, Marilena Defrancesco “l Summer Camp l é na ocajion de piu per binèr adum i joegn di trei teritories e ge dèr l met de se fèr ite, jir sorafora i limic linguistics e cognoscer i fac storics e la carateristiches d’aldidanché di trei teritories touc ite tel projet”. Endrezà tel raion naturèl del sompian de Brentonico, l camp l sostegn defat la cooperazion e l dialogh anter i joegn del Euregio, tegnan su l slogan de la Presidenza Trentina 2021-2023: l Euregio l é joen.
Co la soravèrda de personal profescionèl bilingue, i joegn i pel descorir l Euregio e sie endrez de gra a ativitèdes de delet e a l’averta.
L dit del EuregioSummerCamp de chest an l é “Natura scontra Cultura”. Te la raides che vegn fat dintorn Brentonico i joegn i descoresc e i pel cognoscer polito la storia che sie teritories i à a una, con valivanzes e desferenzes. Se va sorafora i empedimenc, desche la desferenzes linguistiches, tras ativitèdes de spas e de delet de gra al didament di compagnadores che rejona l lengaz mère di bec, todesch o talian. N rich program de ativitèdes da fèr tel temp ledech sera su la setemèna dedichèda al EuregioSummerCamp.
L EuregioSummerCamp l se ouc ai joegn nasciui ti egn 2008/2009/2010 (demò per l Tirol ence chi nasciui del 2007 enscin al 01.09.2007).
Per maora informazions en cont del EuregioSummerCamp drucà chesta direzion: www.europaregion.info/summercamp/
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)